好好彩呢個暑假儲到錢，所以就去左南非玩左差唔多一個月，因為去嘅地方實在太多，所以我會將呢個月嘅經歷break開，今次首先寫左我到步嘅第一個地方，開普敦cape town。
Day 1
今次搭左勁耐飛機，我首先係新加坡轉一程機，去到新加坡再去約翰內斯堡，跟住先到開普敦。一落機已經勁眼訓，拿拿聲番酒店check in跟住就訓左。其實我一落機勁興奮，之前我淨係去過歐洲同澳洲，今次終於可以踏足非洲，之前仲要係咁說服屋企人比我去，最後都去到。呢度其實無我地想像中咁落後，好多野其實都唔差，人仲要好熱情！（不過佢地會係咁sell你買野）Day 1就咁過左，無咩特別！
Day 2
景點一：桌山
桌山係聯合國教科文組織世界遺產其中之一，係2012年仲要入選為新世界7大自然奇景。我就係朝早黎嘅，個陣都無咩人，雖然係咁，我都係要同其他人一架纜車上去，扣左5分鐘到，就去到好望角你幾乎可以望哂成個cape town，係上面係好凍嘅，大家去個陣記住帶衫。
但如果你去嘅話，我會建議你黃昏差唔多日落嘅時候你先落去，因為個陣個景會最靚，當然啦，係會勁多人，仲有就係佢好似差唔多6點幾就係最後一架纜車，如果你要睇哂成個日出，可能就要摸黑夜晚行番幾個鐘落山。
景點二：維多利亞和阿爾弗雷德濱海區
落左山就去番維多利亞海區行街同埋食野！黎到cape town無理由唔食海鮮，所以我就叫左oyster同埋grilled lobster，呢度嘅煮法都唔會好複雜，唔會落好多seasoning，最多都係salt pepper，仲有落paprika，所以你係會食到個海水味，個lobster燒完都好多汁，唔會好乾，我就坐左係出面，吹著海風，最黎我仲叫左杯cocktail添，正！跟住我仲去左附近個market行左幾個鐘。
景點三：The Springbok Experience Rugby Museum
大約行左十分鐘左右，就黎到博物館。身為一個鐘意運動嘅人，梗係唔可以錯過啦，話明rugby museum呢度有好多欖球球衣，獎盃，欖球波鞋。博物館嘅亮點之一係黑橄欖球嘅故事同埋佢同南非社會歷嘅聯繫。呢度仲有互動區，比你測試自己嘅踢波技巧，健身同反應時間。
Day 3
景點一：World of Birds
World of Birds係非洲最大嘅鳥類公園，係呢度仲可以望到桌山，查普曼峰，十二使徒岩，獅頭山等等。係入面睇到嘅雀多到爆，多到有好多你都唔知佢叫咩名，但你都會見到獵鷹，鴕鳥，貓頭鷹，鸚鵡，企鵝，火雞等等。鴕鳥真係好大隻，2個人咁大，又有成個人咁高。呢度仲有個猴子公園，呢度有成38隻松鼠猴，隻隻都咁Q，唔會好似香港個d搶你野食。
景點二：
黎到南非，梗係要感受下陽光與海灘，今次黎到克利夫頓海灘，比起中東杜拜我之前去過嘅海灘，反而無咁水清沙幼。呢度總共有有四個海灘，我仲去左第一海灘衝浪，真係好刺激，不過我唔識係咁跌落水。
玩完都差唔多4點，我都要準備去下一個地方啦，比大家估下我跟住去左邊，估中比個叻你。
#寫出你遊歷 #hutchgo資助旅費1000蚊
