走進西班牙 探索歷史建築
#寫出你遊歷#hutchgo資助旅費1000蚊
建築一直係文化藝術嘅重要一環，尤其係歷史文化。而近現代建築多數都係追求經濟效益同內部舒適，對外觀設計嘅追求自然就退而求其次啦。成個世界嘅建築都變到好單一好無特色，但西班牙就獨樹一幟。
我之前就無黎過西歐，不過見到今年二月飛巴塞羅那機票太平，中意同圍去嘅我決定黎到西班牙（之後都去左葡萄牙）。西班牙係個好迷人嘅國家，尤其係文化藝術同埋野食，當然唔少得嘅就係呢篇遊記嘅主角建築，仲有仲有，黎到歐洲一定要睇足球，個種氣氛同係電視到睇係震撼好多。
瓦倫西亞（Valencia) 嘅科學藝術城。西班牙根本係一個盛產現代建築藝術家嘅地方！由Calatrava同Candela設計嘅科學藝術城堪稱係後現代建築嘅典範。科學藝術城係建係一個乾涸嘅河床上面，呢條河道入面仲規劃建設左一係列嘅公園。
呢度就係中心嘅入口。
藝術與科學城係由幾個部分組成：一個天文館、一個科學館（菲利佩王子藝術科學宮）、一個歌劇院（索菲婭王後大劇院），過左金色堤大橋就係海洋館。海洋館係Candela設計嘅，其餘嘅都係Calatrava嘅作品。
天文館球形嘅天文館：上面有一個透明結構嘅拱形罩，好似一個貝殼，亦都幾似香港嘅科學館。
似一開一合的嘅眼，唔知你地又覺唔覺
呢個角度睇就似可愛嘅貝殼。
歌劇院造型都幾似一艘太空船。
呢個好似豎琴咁嘅就係金色堤壩大橋(Puente l’Assut d’Or)。後面個個深紫色建築就係歐洲最大嘅海洋館。不過我去個陣，海洋館維修緊，所以就影唔到相比大家睇。
大橋嘅斜拉索亦都代表著魚尾，同科學館嘅魚骨互相呼應。
科學館嘅設計靈感同樣黎自於大自然嘅動物骨骼。
Santiago Calatrava係世界上最著名嘅創新建築師之一，亦都係備受爭議嘅建築師，以橋梁結構設計同藝術建築聞名於世。佢設計左威尼斯、都柏林、曼徹斯特仲有巴塞羅那不少嘅橋梁，都設計左里昂、里斯本、蘇黎世嘅火車站，仲有2004年雅典奧運會主場館。但佢嘅設計就比批評藝術大過實用性，據說佢係德國設計左一個玻璃嘅公路橋，雖然好靚，但弧度並唔實際，落雨滑到連人都行唔到上去。
巴塞羅那係唔少建築嘅落腳點，佢出產嘅建築師係真正嘅藝術家。大家有無聽過高迪，他嘅老師蒙塔內爾設計嘅聖保羅醫院都係美不勝收。當然創新係有代價架，聖家堂同醫院嘅資金都因為一直唔夠，聖家堂一直都起唔完，所以最反醫院只可以將計劃原本嘅46棟樓減成27棟。
聖保羅醫院主樓。係20世紀初，醫院已經唔再使用，最後改成為博物館。
以前嘅病房改成嘅藝術展廳。
主樓走廊
醫院嘅手術室。咁鬼靚嘅建築應該有助紓緩手術治療嘅壓力。
行政樓區嘅風格比較簡潔
醫院中庭全景
最後當然係西班牙建築史上最傑出嘅建築家-高迪，巴塞羅那最出名嘅建築幾乎都係出自佢手。黎到巴塞羅那，當然唔可以錯過嘅場建築嘅視覺盛宴，聖家堂、巴特羅之家、米拉之家、奎爾公園都好值得大家去睇。如果淨係得時間睇一個，我就會建議大家去聖家堂。佢係世界上唯一一個仲未完工就列入世界文化遺產嘅地方。好消息就是教堂計劃係高迪逝世100周年嘅2026年將會完工。
高迪嘅靈感黎自自然
登上教堂塔頂就可以俯瞰成個巴塞羅那。最佳嘅登塔時間就是清晨同傍晚，睇日出日落，不過教堂開門嘅時間係9am-5pm，所以冬天嘅光線會比較好，夏天光線太強。
最後感歎一下，或者淨係得西班牙呢d咁自由，熱情嘅國家先可以產生到咁”瘋狂”嘅藝術家，呢d”燒錢”嘅現代建築。”燒錢”不單單係起個陣，仲係永無止境嘅維修。不過亦都多得西班牙，先會有呢d偉大嘅建築藝術品，令到呢個世界唔會淨係得鋼筋水泥嘅石屎森林。
