擁有住優越嘅時區 浪漫嘅海港 嚟悉尼倒數跨年係唔少人嘅夢想 等我係度帶大家嚟澳洲 體驗悉尼嘅跨年慶典啦！
年尾除咗係煙花匯演嘅大日子 嚟到悉尼當然唔可以忘記呢度擁有住南半球最大嘅魚市場啦
有好多遊客甚至一落機就拖埋行李嚟魚市場 掃盡新鮮美食 當然我都唔例外啦！
魚市場幾點開幾點閂門架？
魚市場嘅營業時間為0700-1600
所以無論係早餐果腹 抑制係午餐嚟掃美食 都極度推薦嚟Sydney Fish Market大快朵頤呀
不過因為海鮮都係由朝早送過嚟 所以想食最新鮮嘅生蠔同三文魚嘅話 梗係朝頭早嚟食過最豐富嘅海鮮大餐啦！

點樣嚟魚市場呢？
由Sydney Central Station出發 坐輕鐵501由Pitt street坐9個站去Miller street落車
站外沿住指示牌行就可以直達Sydney Fish Market啦
如果你係步行過嚟嘅話 你就會經過一個露天車場 見到大大隻寫住Sydney Fish Market嘅橫額就到啦！
悉尼魚市場有咩咁特別呀？
一入到嚟魚市場真係俾啲到色彩斑斕嘅海鮮吸引住 而我今程嚟最主要當然係試呢度嘅塔斯曼尼亞生蠔啦
喺魚市場行個圈 見到陳列嘅海鮮相當吸引 而我留意到係魚市場入面近90%顧客都係亞洲人嚟架
行勻成場都見到生蠔一打賣梗22AUD 但驟眼望落唔算肥美 成隻生蠔塌咗落去
反而呢檔賣現場開殻生蠔24AUD 就值得推介 即剝生蠔果然新鮮肥美啲
仲有另一樣必食嘅就係呢個現燒帶子 配上芝士 蟹籽 照燒醬油 芝士入面仲塞滿壽司飯 望見到流晒口水呀！
當然 現場仲有其他各類海鮮供選擇架 不過聽講呢度嘅熟食唔算煮得太好食 所以最後都無坐低嗌熟食餐～
後來再試埋三文魚刺身壽司拼盤 同香港就無得比喇 但如果掛住日本嘢嘅話試試都無妨架～
買完海鮮 其實現場都非常爆滿 除咗場內座位之外 場外都有望海座位 都幾chill幾寫意架
不過就要提防小心白鴿搶走你嘅食物呀！
去完魚市場食大餐之後 係時候去悉尼海港散散步 物色下今晚倒數嘅最佳觀賞煙花位置
但其實因為今晚已經係倒數 所以悉尼警方已經封咗路 包括悉尼海港嘅Circular Quay Station
所以就要搭去其他站步行前往去海港啦！
點樣去悉尼海港？
平日的話 可以由Sydney central station坐地鐵去Circular Quay Station
如遇上倒數節日Circular Quay會遇上人流管制而封閉 建議乘搭至附近車站
如 Wynyard 或 Martin Place 再步行約10至15分鐘前往悉尼海港
倒數日子嘅悉尼海港會點架？
傍晚時份嚟到海港已經有封路 只好遠眺悉尼歌劇院
因為場內美食車食物唔太吸引 所以我地選擇再搭返出去物色晚飯
食完晚飯已經係夜晚九點了 再返嚟Martin Place已經有大規模嘅人流管制措施
悉尼警方更加會派出馬隻比警員騎乘 方便巡邏
望吓 九點沿住行去海港已經人山人海 再晏少少嚟分分鐘入唔到嚟添
因為到處都係封路同埋滿人 最後我地十點係呢個位置安頓打發時間
終於等到倒數喇 Happy 2019!! 現場有煙花匯演 氣氛非常高漲
唯一可惜嘅係望唔到呢個位悉尼歌劇院 睇唔到對面岸嘅煙花！
睇完煙花之後就要順住人群慢慢推進離開 周圍都有廣播提醒大家可以去邊個站上車 以及鐵路延誤同埋取消嘅狀況
祝大家新年快樂！
#寫出你遊歷 #hutchgo資助旅費1000蚊
