#寫出你遊歷 #hutchgo資助旅費1000蚊
雖然小編係第一次寫遊記，但我去旅行嘅經驗都有唔少，今次小編終於唔再係去亞洲地區玩，去到去南半球嘅澳洲，不過我就唔係去一啲相對熱門嘅Melbourne Sydney Cairns 個啲，今次走左去西岸嘅Perth。係呢度講聲先，呢個trip唔係啲咩窮遊trip，啲schedule都pack到實哂，大家都可以參考下，雖然有啲chur，但又實真係幾好玩。
Day1 – Kings Park and Botanic Garden
朝早去左café飲左杯澳洲好出名嘅flat white，食左件cake就黎到第一個景點啦！Kings Park 係全世界其中一個係城市入面最大公園，我同班friend成個朝早就坐係呢個公園chill，呢種感覺係香港真係完全感受唔到，咁鬼大個草地，有啲微風，仲有成班細路係你面前周圍走，好有活力，個感覺真係好舒服。
Lunch – Livingstone’s Urban Jungle
因為一陣我地要去西澳藝術館，所以我地就係附近搵左一間餐廳食晏。呢間就主要食啲sandwich toast bread 嘅野，我就叫左個toast，味道唔錯可以一試。
Day 1 – 西澳博物館+ 西澳藝術館
食左個晏之後，我地就出發去博物館啦。入去西澳博物館係唔洗門票唔洗錢架，唔似一啲係歐洲嘅博物館。館內面珍藏左唔少有關西澳嘅資料，動物標本，礦石，恐龍骨骼標本等等。跟住我地就去到藝術館個邊行，比個溫馨提示大家，如果大家對藝術無咩興趣嘅話，建議大家唔好去，因為入面嘅展品都比較抽象，唔中意嘅人真係會悶親架，展品嘅相我就無影啦，始終唔太尊重個場合。
Day 1 – St Mary’s Cathedral
好多人問我，去外國有啲咩一定要睇，我會答佢，咁一定係大教堂！今次黎到聖母無原罪主教座堂，同係歐洲嘅教堂有咩分別？老實講，分別唔大，但係感受一定會唔同，始終唔同地方嘅氛圍文化宗教氣息都唔同。一踏入St Mary’s Cathedral，個種心靈上嘅寧靜真係好正，呢一個感覺正正就係我去旅行其中一樣想得到嘅野！
Day 1 – 珀斯鑄幣廠
黎到今日最後一個景點啦。因為今日都行左唔少景點，所以我都有啲累，黎到Perth mint只係行左半個鐘左右，不過我地臨走都有買啲souvenir，佢有一啲好特別嘅collector coins，不過價錢就大概60AUD到550AUD。
Dinner: Il Mandolino Restaurant & Pizzeria
呢間餐廳都係主打spaghetti, pizza, bread個啲，味道同一般香港西餐廳無咩分別，最大分別可能係呢到有flat white飲。中規中矩嘅一間餐廳，經過可以試下，但唔需要特登黎食。
Day 2 西澳水族館
朝早係酒店食breakfast buffet，無咩特別。大約10點左右，我地就出發去西澳水族館，西澳水族館係澳洲最大嘅水族館，仲有一條好大嘅地下通道，你一望上去就會見到有勁多魚係到游黎游去，勁free咁。唔單止咁，如果你撞岩季節，而你又識游水嘅話，你就有機會親身落水睇coral，同玩浮潛。呢個event會係10月至4月搞。
Day 2 天鵝谷
天鵝谷，一個字，靚，講完。食完晏我地就transit左去swan valley，呢度係靚過kings park 一百倍，藍天白雲，呢啲係香港搵唔到嘅野，呢度真係任你睇。swan valley係澳洲著名同最悠久嘅葡萄酒產地，黎呢度都有少少唔方便，我地就一早book左local tour，仲有得比我地試酒添，不過你就預左要貴少少啦。我地成個晏就去左Yahava Koffee Works睇咖啡，仲有參觀酒莊，chocolate factory，house of honey等等，所以呢度絕對係值得花時間黎啦。
Dinner: Alfred’s Kitchen
今日又係食burger呀，呢度burger即叫即整，好多料，好實，好多汁，呢度嘅澳洲和牛漢堡，一咬即融，價錢大約係10AUD 至20 AUD啦，唔算好貴，野食質素絕對對得住價錢。
Day 3 費里曼圖監獄
一早就睇啲好凝重嘅野，不過真心係一個好好嘅體驗黎，始終未見過一啲prison嘅設施，一啲cell係點，所以係幾有趣嘅！睇個陣時大家唔洗驚唔明架，因為係有audio guide架。
Day 3 弗里曼特爾市場
晏都無食就黎左弗里曼特爾市場啦，我地黎個陣無星期五，人都開始多，除左有遊客之外，都有唔少本地人，呢度簡直係購物天堂，有新鮮農產品、有機食品，天然手工皂、香薰精油、芝士、蜜糖、蜜糖蛋糕等，仲要有好多檔美食，食到我地勁飽。
Day 3 圓屋
圓屋其實唔係實係圓架，係一個十二邊形黎。提提大家，呢度晏就三點半就收啦，記住預鬆啲時間黎。Fremantle係一個海港城市，無啲咩高樓大廈，所以係Round House睇哂成個海景，無得彈。不過好可惜嘅係我地個日去無咩風，所以係上面曬住都幾熱下。
Day 3 WA Maritime Museum
西澳海事博物都係係Fremantle嘅，呢度最正就係有個submarine tour，每半個鐘就有一場導覽，不過假日黎可能就會無位啦，入到submarine你會見到有飛彈呀，入到個倉係勁逼，不過係有勁多好精密儀器。睇完呢個tour，我地又番番去海邊食野，今之食左fish and chips，英國好出名嘅菜係澳洲都唔差，問過老闆，佢呢度嘅fish係用cod整嘅，薯條係粗嘅，但係炸得唔夠，唔夠脆。
Day 4 羅特尼斯島
呢日一早起身又去左Fremantle，因為我地要搭船去羅特尼斯島，搭左差唔多30分鐘，就到左啦。呢個島有幾樣野係一定要做，第一：浮潛，我地都有去浮潛，係半透明嘅海水到，你望到好多coral啦，細魚啦，不過本人係唔識游水嘅，所以玩緊個陣都好驚。第二：海灘，羅特尼斯島有成63個海灘，個個水清沙幼，我地玩完浮潛之後仲去左滑浪，其實好鬼難，好難平衡，我玩左成個鐘，係塊板上面嘅時間都唔知有無10鐘。最後一樣，睇短尾矮袋鼠，仲要記得同佢地合照呀。
