Day 1 TOMAMU
香港 7:50 > 新千歲 14:00
搭左4個幾鐘機終於到左北海道新千歲機場啦，搭飛機既時間比我想像中短，只係比東京長少少，我地攞完行李之後行去搭車去市區，沿途已經見到好多好可愛既動物公仔，果陣咁岩係STEIFF FESTIVAL PLAZA，展出大型動物公仔，有北極熊、獅子、老虎等等，我諗係應番旭山動物園既特色。行出去會經過國內線，有好多手信店，我地即刻買左KINOTOYA芝士撻食，芝士味好香濃。
我地第一站係去TOMAMU睇雲海，JR去到南千歲轉車，冇諗過竟然戶外係咁凍，果陣得10度左右，著住外套都唔夠暖。
Nininupuri
到左TOMAMU，搭免費接駁車去The Tower check-in 左先，已經6點幾，我地連上房都冇上就要趕去森林餐廳食放題啦。TOMAMU既環境好靚，好清新，不過就係特別凍，因為佢地勢比較高，行左十分鐘左右行到去餐廳。餐廳外面既景超靚，真係好似比一個森林包圍咁，入左夜外面都會開D綠色燈映照住D樹，更加靚。
個放題都幾多野食，整體水平都唔錯，D牛肉同羊架要排隊每次拎一份，肉質好鬆軟。
水之教堂
食完放題好飽，之後我地上房擺低D野就去左水之教堂。入到去個教堂超多人係到影相，仲有D細路係到嘈。呢到真係好清幽，雖然我唔係教徒，但如果無人既時候，我真係好想黎靜思一下。
Day 2 雲海、札幌
我地凌晨3點幾就起身了，為左去睇雲海，差唔多4點已經天光。但好失望，睇個電視既雲海情況係雲中，即係應該乜都睇唔到。之後我地排隊去搭纜車上去，超多人排隊，排隊都有半個鐘先搭到纜車。從纜車俯瞰下面既景真係好靚。
上到去雲海平台就更加凍了，好似得2度左右，雖然我好采預備左件heat tech底衫，但仍然係好凍。望出去係一片白色，乜都望唔到，好傷心……唯一有少少野睇就係隱隱約約見到太陽。
Restaurant Mikaku
睇完雲之後去食放題早餐，住宿係包埋早餐，唔駛另外買。
重點係個玉子燒，睇住2個廚師係到逐層蛋漿放上去煎，真係好考工夫，整一排都需要幾多時間。個玉子燒好香好好食，又軟林林，但唔食得太多，因為都幾油膩。
白色戀人公園
白色戀人大家都好熟悉，原來製造呢塊美味既餅乾既地方係咁靚，係札幌必去既景點。一去到有少少失望，並唔係因為佢唔靚，而係咁靚既庭園竟然今日冇晴天，烏雲密佈，不過天公造美，好快D雲竟然散哂，超開心。淨係工廠既建築已經做得咁有心思，唔怪得白色戀人咁好食！我地入到去個公園，真係好似係歐洲咁，英倫風既建築同我係英國睇到既有得揮。仲有有一片好色彩繽紛既花田。
跟住我地食左個白色戀人雪糕，第一次品嘗北海道既雪糕，牛乳濃度真係其他地方比唔到既，真係好香濃呀。食到一半，有D泡泡走出黎，播放音樂，個鐘樓同其他地方都有D公仔係到表演，好有童話feel。
行完出面個公園我地就入去個工廠，衣家唔駛比入場費，不過係因為個生產線唔知暫停定點樣所以冇得睇佢地整菓子既過程，有D可惜。裡面係好有歐洲宮殿風格既展館，有好多關於朱古力既歷史，仲有好復古既展品。裡面有間café，外面擺左好多用朱古力整既藝術品，呢個白朱古力整成既玫瑰真係超靚。
紀念品店買左好多呢到限定既產品，有屋仔同個鐘樓形狀既盒裝住曲奇，我地都買左好多野食，買夠5400YEN免稅。
狸小路
我地係地鐵站落左車就求其搵左間餐廳食，叫做遊鶴，應該係專賣蕎麥面既，一人叫左一個雞肉滑蛋蕎麥面，個湯幾清香，味道唔錯。之後去狸小路行街，狸小路有好多號碼，每到既店牌都幾有特色，不過來來去去都係藥妝店、手信店同餐廳，所以行左一陣就走左。
Day 3 札幌
Fruitcake Factory既水果撻同埋一盒雪印牛奶做早餐，好幸福呀，D蜜瓜真係好香甜，撻皮好香既牛油味，又好脆。北海道既牛奶就唔駛講啦，牛奶味真係好濃。
円山Pancake
今日去到竟然冇人排隊，可能因為北海道未算係旺季，我地一入去就有位，不過都幾乎滿座了，呢到好似全部都係本地人，冇遊客。我地叫左一個原味同莓果Pancake，佢一個叫Angel一個叫Devil。
咁多本地人推介既，都唔係岩我口味，個Pancake係半生熟，其他人可能覺得係入口即溶好正，不過我個人有D驚生蛋，一路食都聞到D生蛋味，都係比較中意食熟D既Pancake。
時計台
北海道真係好多歐式風格既建築。不過時計台做緊維修工程所以冇得入去參觀，只可以係出面望下，好采我地果陣去都仲有出面望，衣家聽講連外面都做緊工程就痴左塊時計台圖案既布係出面。
途中又有睇到雪印既專門店，好多甜品同菓子，可惜quota已經用完。
北菓樓
好似係本店黎，有好多野食賣，有個限定既圖書館菓子，用一盒曲奇睇落好似一本書咁，好吸引，但我對入面既野食唔係好感興趣所以就忍住手冇買。呢到超多野可以試食，試左呢D好似係米果既野，叫開拓XXX，函館果隻味係最濃最好味既。
樓上就係Café，有大大個書櫃同一部白色既三角鋼琴，不過應該唔俾人彈，個環境真係好靚。
北海道廳
北海道廳內外都係好復古。發覺好多景點同地鐵車站都會有個印台俾人cup個印做紀念，不過我冇集齊哂，有D可惜。係外面又覺得自己去左歐洲一樣，好似有個庭園咁。北海道廳係以前既政府廳，衣家用黎做展覽，裡面有以前官員D office同好多有關北海道歷史既野，仲有個係到收集日本人簽名要係俄羅斯手上奪回一個島仔，但我冇留意係咩名。有個冬天既北海道廳模型都好靚。
六花亭本店
雖然話機場都有齊好多手信，但本店都係比較多限定既野食，所以都係要去下六花亭本店。呢到好似都係D本地人會去既地方，得閒買少少黎食，所以會比較多散裝，而機場既就會好多一盒盒，我地梗係買散裝啦，因為平D。我地都係買左好多人推介既提子乾奶油餅同士多啤梨粒朱古力等等。
ESTA
ESTA有好多層，但我地只係去左loft同附近賣衫既店，loft都係好多得意既野。B1樓就有間100 yen店CAN DO，不過好細，買左幾件日用品，真係好抵。
札幌拉面共和國
晚餐我地去左9樓既Ramen Republic食拉面。個門口氣氛唔錯，有花巧既裝飾。裡面有好多間拉面店，札幌、函館、白樺等等，搞到唔知食邊間好，見到札幌拉面果間睇落D豚肉好多，就揀左呢間黎食。呢個時候都仲係5點幾，未到食飯時間，所以冇咩人。我地都叫左個好多豚肉既拉面，仲有成隻塘心蛋，真係好豐富，湯底我覺得醎左D，不過都好正，日本人都係中意重口味既湯。其實仲有一個再多D豚肉既款，不過真係太多啦，會食唔哂，香港既拉面都得果2片，真係應該學下人。食完真係大滿足呀。
Day 4 旭川
雪之美術館
呢到好似唔算熱門既景點，但中意歐式建築既都係要黎睇下。美術館外型好似一間教堂咁，到處都係雪花既雕刻，感覺好神聖。
呢到可以買美術館同動物園既套票，1500YEN，比分開買平20YEN。呢到好似歐式既宮殿咁，簡約而華麗。無論係門柄、吊燈定係樓梯扶手都係精心設計過，全部都係雕有雪花既圖案。
跟住再行入去就係一個冰雪既展廳，隔住玻璃可以見到好多冰既結晶，彷彿去左另一個世界咁，同時又感嘆大自然真係好神奇，可以造出咁多形態既冰，真係好靚。
行完呢條短短既走廊，就去到一個大廳，有一個高台同好多座位係到。台上面有個鋼琴同南瓜車，天花版都別出心裁，好夢幻、浪漫。咁岩我地見到今日會有一對新人係呢到結婚，好采我地早黎，唔係晏d可能就冇得參觀。
入面仲有d展廳，不過都冇咩特別，多數都係講雪花點樣形成同埋有咩唔同既形狀。成個館既重點應該就係呢個大廳同冰結晶走廊。仲有一個房仔係展示唔同既雪花形狀，就咁睇相好似好靚咁，其實去到望只係一d圖片，而且近睇像素係唔高，影下相就好啦。行完就沿經岩岩既路線番番出去。
雪之美術館交通︰旭川中央巴士 (蘆旭線/ 深旭線) 去到高砂台入口行十分鐘左右
AEON
差唔多到食飯時間，我地番番去旭川站隔離既AEON既food court食野，順便行下超市。呢到既AEON既野食真係多過香港AEON好多，仲睇落好正。
去到food court買左一個雙拼炸雞炸魚柳忌廉汁蛋包飯，日本人真係用心，即使係food court都係即叫即整，好新鮮，D汁多到食唔哂，D炸雞同魚柳又好香脆，絕對有餐廳水準。
旭山動物園
動物園應該係旭川必去既景點。第一站係企鵝館，一群可愛既企鵝係到又唔點郁唔知做緊乜，不過諗緊佢地會唔會覺得好熱，又冇雪地。由於對企鵝冇乜興趣而佢地又唔郁，好快就走左。
跟住就係去”凶殘動物”既館，亦係我比較有興趣既動物，就係老虎同獅子，第一次咁近距離見到老虎，真係體型超大，身上既紋好靚。本來隔離有獅子，但好不幸佢地前排都死左，冇哂獅子。跟住行行下有隻好似係雪豹，但睇唔清楚，佢係上面個網到懶洋洋訓左係到，我冒住俾太陽射住去抬頭影佢，結果佢都冇郁過，D毛擠哂出黎，真係好想摸下。另外有幾隻豹住埋一齊，好似係三母子/女，見個呀媽同個仔鬧交，好大聲，好似係個仔走去撩個呀媽，不過當然冇傷害到對方。
最有趣既就係貓頭鷹，呢到有兩隻，白晒晒果隻應該係snow owl，真係超得意，唔知係咪係到恰眼訓緊，另外果隻仲要同望住我，好可愛呀。佢地全程係同一位到冇郁過，到我地走既時候番番去都仲係同一個位置到……
跟住北極熊都係呢到既重點，不過佢地應該好辛苦，咁熱既天氣仲係戶外行來行去，見住佢地咁厚既皮毛我都覺得熱，可能熱得濟有隻北極熊走去游水，好可愛。北極熊果個活動區仲整左個透明半球，我地可以去下層展館到排隊企去申個頭去近距離望下佢地。
跟住我地就去左狼既展館到，一行近就已經聽到一堆狼嚎既聲，就好似平日睇哈士奇咁，好可愛，究竟咩時候佢地會一齊咁叫呢。之後睇到一半見到有幾隻狼係毫無前兆又同有默契咁行去恰一隻狼，打哂交咁，果隻狼係到慘叫，毫無還手之力，我地幾驚佢會受傷，我都唔敢錄影，但之後又無啦啦冇再打，真係奇怪，唔知佢佢地之間有咩語言。果隻狼又好似冇受傷到咁，可能只係玩耍啦，但隻狼D叫聲又好似好慘，俾人打到七彩咁。
仲有好多動物，水豚、孔雀、浣熊等等都好值得一睇，最可惜係冇得睇獅子。行左大約3-4個鐘我地就走左。
旭山動物園交通︰旭川站搭旭川電氣軌道 旭山動物園線47號
到去市區我地去左100yen 店Seria同樓下既大型書店Maruzen行左陣，呢到間Seria都幾細，冇之前Daiso咁多款，我地買左幾件日用品。跟住沿住平和通買物公園行左一陣，基本上都係餐廳多，都有唔少鋪已經閂左門，所以都冇咩好睇。我地淨係去食左Mr. Donut食左2個donut，都幾好食，不過太多款啦，一次都食唔哂想食既。
夜晚我地就去左AEON買D熟食，去到果陣已經唔多選擇，有特價，我地買左一堆串燒同便當、飯糰，仲買左D布丁、乳酪、牛奶，串燒中左伏，竟然有個係雞皮串，好核突，我地唔識日文都冇睇到，個樣又同平時D雞串差唔多，結果就浪費左幾串冇食到。
Day 5 美瑛、富良野
朝早食左少少野做早餐同埋琴日買既布丁，個雪印布丁真係超好食，上面有白色既好似cream咁既野，好creamy香濃，下次一定要買好多杯食。
白金青池
落完車行幾分鐘就到，個青池其實好細，但真係好靚，好好采個天好藍，D水有好特別既顏色，係藍綠色，聽講四季都唔同色，希望下次可以冬季黎睇。望左二十分鐘左右我地又去番個巴士站等車搭去美瑛。
Furano Marche
呢間店好多菓子同薰衣草既製品，我地買左個芝士蛋糕仔，都幾好食。
行左一個鐘左右就去番個站到搭薰衣草慢車號去富田農場，佢唔同平時既JR，係6-8月左右限定專門去富田農場，車廂都幾得意，一路行駛一路睇景，好涼爽。
富田農場
雖然六月富良野美瑛D花都未盛開，但勝在比起7月唔算太多人，黎到淨係得一片花田，其他都未開花，不過都好靚。
上面有間Café，我地買左個幾乎黎到必食既薰衣草雪糕，粉紫色既外表真好吸引，又有好香既薰衣草味。
雖然薰衣草田未開，但都有個溫室種左少量薰衣草俾我地早黎既人望住先，都算不枉此行既，D薰衣草行近真係好香。
呢到仲有D花舖，個店既裝修好靚，到處都係花，好寫意。佢有賣好多種花，我地買左D薰衣草乾花番去屋企擺。
黎左冇幾耐基本上都行哂成個農場了，又冇咩花田，坐係到等車到。我地又番番去旭川拎完行李再轉車去番札幌到住宿。係札幌我地又忍唔住再買左Fruitcake factory番去酒店食，買左蜜瓜同芒果撻，D蜜瓜真係甜到漏呀。
Day 6 小樽
一起身我地搭JR去小樽，好快就到了，黎到去到小樽運河，就係有好多倉庫屋同條河，隔離有D人係到擺攤，其實個景都唔算係好靚，不過幾有復古既味道。
呢到到處都係歐式建築，有一間好似係藝術館既有好多玻璃藝術品，仲有牆上掛左好多面具，好吸引，可惜唔俾影相。
Letao芝士蛋糕，芝士味好香濃，但係只係細細件已經食到好漏，真係落好重料。
小樽最多就係唔同用途既玻璃工藝品，有杯、筷子座、醬油瓶等等，全部都好精緻，但有D貴到痴線，最平既都差唔多一百蚊件。另外就係音樂盒，仲有好多有關古典音樂既展品，都係非賣既，有舊式唱片機，仲有個管風琴，不過唔知係咪真既，中意古典音樂既我真係睇得嘆為觀止。
小樽都好細，行左半日就行到七七八八了，走之前我地去左係出拔小路既Popura Farm分店食蜜瓜雪糕。本身想去富良野本店到食，但係冇時間。結果去到果陣佢話大同中size都已經賣哂，得番細既，我地唯有買細，結果真係超細……但價錢又唔係差很好遠，細既真係超唔抵，幾啖就冇哂，D雪糕都融得好快，個人覺得D雪糕味道冇咩特別，蜜瓜都幾甜既。
蝦蟹合戰
之後我地番番去札幌，食三種蟹放題，好似係帝王蟹、毛蟹、松葉蟹既，普普通通，最好既應該係帝王蟹了，隻腳最大隻最多肉，但太醎又冇乜鮮味，毛蟹又少肉又冇味，唔知點解咁多人推薦呢間野，定我味覺有問題？跟住食完第一輪我地係叫帝王蟹腳，結果佢俾既野同第一輪既差好遠，第一輪既好齊整既幾隻腳，到之後我地叫既係一D斬斷左又散收收既腳。跟住隔離咁岩又有幾個香港人，講左幾句，話呢D放題都係咁，第二輪開始俾既野就冇咁好了。之後我地食左2輪就飽左。
Day 7 由仁
上網好少見到有由仁花園既遊記，但係呢到真係好靚，又好少遊客，如果想悠閒旅遊，一定要黎呢到。
去到由仁站基本上都冇乜人，我地去左隔離既社區中心搵人問下可以點樣去，因為語言不通我地講左好耐先問到，但佢地都好耐心聽，個女職員好好人，幫我地call的士，帶我地去等的士既位，佢仲諗住陪我地等添，我地見好耐都未有，唔好意思，就叫佢快D返去啦。
一落車去就見到D歐式既小屋，穿過呢到就會去到花園。
花園真係一望無際，天氣仲好好。呢到仲有個南瓜車，好有童話feel。
行左2個鐘仲左右差唔多行完，我地就去左花園裡面一間餐廳食放題lunch。個凍南瓜湯好creamy呀，仲有D菜唔知係叫咩名，係香港冇見過，好好味。一邊欣賞住窗口外花園既美景一邊食大餐，好寫意。
由仁花園交通︰搭JR到由仁站，再轉的士約5分鐘 (車費︰1030YEN)
之後我地番去札幌既Ario Sapporo既Ito Yokado超市掃貨！因為係係市區最後一日，每次旅行番香港前都一定去超市掃貨先，買左好多零食同杯面番去，每次都要講，真係平過香港好多呀。仲可以見番我係香港食過但衣家搵唔番既蜜瓜曲奇，即刻買左兩包。
Day 8 新千歲機場、返港
一大早就去左機場掃手信，係市區憋左咁耐就係為左係機場一次過買免稅，國內線既店真係睇得眼花繚亂。
去北菓樓買左夢不思議泡芙 ，吉士味好香濃，爆餡果下真係正。
呢到有拉面道場，來自唔同地方既拉面，係札幌食左札幌拉面，今次想食清淡D，試下函館鹽味拉面。但原來鹽味拉面都唔係D好清淡，個湯真係好醎。
食完掃完貨就去上機喇。
新千歲 15:00 > 香港 19:40
搭飛機果陣遇到氣流搞到隻耳同個頭超痛，番左黎香港幾日先好番。
北海道既野食同景都超正，今次8日只係去好少景點，下次期待再去離札幌遠D既地方。
以下就係我部分既戰利品，好多都好正，三方六蜜瓜味真係超好食。
#寫出你遊歷 #hutchgo資助旅費1000蚊
