今次主要去韓國嘅目的呢就係為咗賞櫻啦！3月尾4月頭就係開花時期 可能特別多人去賞櫻嘅關係所以機票都唔平要成二千幾。
Day 1: 香港>首爾>釜山
凌晨機到首爾就緊係去搭機場巴士車去首爾站附近個汗蒸幕（Siloam）過一晚夜啦。機場去到汗蒸幕就凌晨兩點幾，訓幾個鐘就要起身搭9:00個班ktx去釜山。
松島天空步道>甘川洞文化村>釜山塔
去到釜山就放低行李係地鐵locker就直接去挽，第一個地方就去咗全長365m嘅松島天空步道。
好快行完條步道跟住就去釜山必去嘅甘川洞文化村，成條村真係好大有好多影相位，尤其係小王子個到就特別多人排隊影， 行到一半覺得攰就係個到揾咗間食炸雞嘅入去食，不過我個人就覺得唔太好食～
最後係差唔多日落嘅時間就去埋釜山塔，可以係高處眺望成個釜山！個㙮除咗可以睇景之外沿途仲有好多靚嘅佈置～
晚餐就去咗홍콩반점0410食地道嘅炸醬麵！食完晚餐翻locker攞埋行李就去酒店check in喇，因為機票比較貴嘅關係，所以都揀咗啲平嘅住宿，咁係釜山就住係Trinity Hotel 三人房大約$486 一晚。
Day 2: Skyline luge （斜坡滑車）
Skyline luge係全世界得四個國家有得挽，難得黎到釜山咁就緊係去挽下啦。
去到要坐空中吊椅上山頂即係起點，挽嘅時候可以自己控制車速，鍾意幾快都得！都真係幾刺激下～total挽咗3次咁多。因為來回車程都成幾個鍾，所以呢日淨係去咗一個地方。
Day 3: 五六島>海雲台>廣安里海水浴場
第三日就去咗五六島天空步道睇海景先，skywalk個入口有鞋套一定要著咗先可以行入去～
成條skywalk都係透明嘅，仲要係個懸崖上面，望落去都真係有啲驚。不過望住個海景吹下風都係幾舒服嘅。之後lunch就去咗釜山必食嘅雙胞胎豬肉湯飯！
跟住就去咗海雲台～高樓大廈隔離就係沙灘都幾特別，仲見到好多人係到餵海鷗。海雲台附近有間cafe叫做cafe roof top，望住個海景飲杯嘢都幾relax下。
夜晚就去咗廣安里海水浴場睇夜景，廣安大橋真係好靚！個到仲有得買啲小煙火黎放。
Day 4: 余佐川櫻花道> 首爾
終於黎到成個trip嘅重點！個日係鎮海軍港節櫻花慶典嘅第一日，朝早已經有好多人排隊搭緊車去鎮海賞櫻。未到余佐川橋沿路已經俾好多櫻花包圍住，雖然真係好多人，但係見到四周圍都係櫻花都值得！
賞完櫻之後就撘翻夜晚6點幾嘅ktx翻首爾~
而首爾嘅住宿就係弘大嘅egg guesthouse 三人房大級 $428
Day 5: 江村鐵道自行車>南怡島
因為唔係第一次去首爾，所以今次就去咗啲特別啲嘅地方。江村鐵道單車可以一路踩住單車一路睇景，雖然要踩差唔多一個鐘，但係其實有好多都係下坡所以唔係好攰。
鐵路單車去南怡島好近好方便，去到要再坐船/zipline先可以到達個島。可惜個日zipline冇開所以只可以搭船去。南怡島種咗成大片水杉，而係個島上亦都成日見到啲松鼠，孔雀…個啲動物周圍走！
Day 6: 梨大，明洞> 香港
成個trip都冇乜點安排去買過嘢，咁最後一日緊係去明洞，梨花女子大學去買夠佢啦！
＃寫出你遊歷 ＃hutchgo資助旅費1000蚊
