我知道呢度已經有好多人分享過甘川文化村 , 但我呢次都有少少另類經驗 , 希望幫到未去過既朋友啦。
而且海量圖 , 希望大家見諒。
入正題 ~~~~~
———————————————————————
因為之前有朋友黎過 , 我對呢度 d 彩色屋有深刻印象
呢次終於黎到釜山 , 點都要黎行一行
當然 , 網上做左功課點樣坐車黎。
9成9既 blogger 都教大家係土城站(109) 6 號出口 , 係釜山大學醫院度坐巴士去
就連文化村既地圖都係咁教人去 , 有 3 條巴士線去既 (1-1 , 2 , 2-2)。
咁睇地圖 , 土城站又真係差不多最近甘川文化村
但我係食野果陣又得閒得濟 , 就同大家 google 一下。
西面站 (精誠食堂) -> 甘川文化村
第1個 , 地鐵轉行路 , 真係傻的嗎 ?
第2個 , 地鐵札嘎其站(110)轉 2號巴士 , 咦 ?
第3個唔想講 , 複雜到唔識睇。
咁第2個路線話巴士係札嘎其站開出 , 之後先路經釜山大學醫院 , 即係我地會上車先 , 咁即係好大機會有位坐喇 , 因為都有 blogger 話過釜山大學醫院站好多人上車。
雖然 google 都會有出錯既時候 , 但我想試試 , 因為睇到條山路咁轉來轉去 , 企係度都怕吃力。
咁係札嘎其站 3 號出口出 , 向後行去過馬路就係。
去到個站已經有2號巴士係度 , 車身有中文 “甘川文化村”。
車入面有路線圖 , 唔係當我識睇呀
不過唔怪得可以係九曲十三灣既山路行走 , 原來係細車黎 , 我地架車去到釜山大學醫院前已經冇左一半座位
司機係亞豬媽黎 , 技術真係一流 , 而上山前架車滿左 , 係連企位都滿。
巴士車程都 10分鐘左右就到 , 大家除左睇窗外見到之外 , 亞豬媽都係舉起甘川文代村既小冊子 , 真係唔識韓文都知道到要落車
一落車我就行前面影相 , 呢個角度都好靚 , 亦比我無意中影到其中一個景點。(留意左下角)
有3個人形 , 叫融為一體 , 佢地背影 , 可以同文化村個景配合到。
影完就行返去後面遊客中心果面入去文化村喇
一入去已經有多個大型地圖
之後就見到特色既屋
必影既人頭鳥
半身牛仔褲
魚牆
到左魚牆 , 就另一樣野做 , 就係買地圖 , 而賣地圖既地方就係魚牆對住既地方
呢度係 17 藝術商店 , 成間屋凹左落去既 , 樓梯既另一邊都有畫 , 真係一絲不茍。
不過咁樣睇好似係 3 隻羊 , 細心再睇 , 有隻係狼扮羊架 , 好攪笑之餘 , 我諗起香港。
其實由入口開始都有 d 地方賣地圖。
點解要行到咁入先買呢 ? 因為呢度就係其中一個蓋印仔既地方囉
即買即蓋 , 方便晒。
當我買完地圖行出黎 , 就比圖中坐係度 , 帶著帽既伯伯 , 行埋黎搶左我既地圖 , 拉我返去張櫈度。
之後佢打開地圖 , 好細心用簡單英文教我地用最快既路線去蓋晒果 9 個印仔。
佢教既路線 , 其實係門口都有 show 出黎 (粉紅色路線) , 不過佢會係你張地圖畫一次之餘 , 仲講解埋
仲有 , 佢教我行去 B 點果上巴士 , 因為架車會按藍色線咁返出去市區。(A點係正常上車既地方)
其實都有少少 R 頭 , 因為去到尾果陣係要行小路 , 不過去到先算。
之後佢叫我地去番入口果面 , 果度有間屋入面有其中一個印仔
黎到就入去睇睇啦 , 似係歷史館
背包既人其實係度蓋緊印
我好喜歡雪景果張呀~~~
唔知呢度落雪係咪仲凍既呢
之後又行返去魚牆果度行樓梯上去
呢間就係 10 照片畫廊
蓋完就再上 , 出門口右轉 , 再右手面果度再上
中間就有12 夜幕之家 , 太細及人多 , 冇影到。
再行到最上既屋就係第四個印仔既地方 , 13 天空之脊 , 而蓋左呢個印 , 就會有第一張名信片送比你
居然係我好喜歡既雪景呀 !!!!!!!!!
換完就上左天台影相
係天台望番落去個門口 , 見有幾張長枱 , 其實係可以比大家即場寫名信片 , 佢地有得代寄 , 因為唔想浪費時間 , 所以冇即場代寄。
呢個天台正面就睇晒成個文代村既景
岩先張圖 , 大家見唔見到最右手面有咩特別
原來係有個少女係度遠望緊風景架 , 呢度真係要好細心留意每一個角落 , 會有驚喜。
呢度既背後都有呢 d 彩色屋仔
又可以見到釜山塔
影完就落番去大路 , 見到好可愛既貓仔
見到可愛既壁畫
可愛既老人家
再行前就見到畫滿小王子既屋
KISS 壁畫 , 上面果 d 係鎖黎。
呢度可以用另一個角度睇遠景
再前就見到小王子坐係度
一齊大叫吧~~~~~~
影完小王子 , 就到 15 書店咖啡館喇
而書店咖啡館同燈塔中間就係蓋印地方 , 不過燈塔好似唔同左顏色
又有貓 , 真係好多貓
似唔似樣呢 ?
一直行都好多壁畫
仲有故事
又行到去另一個魚牆
第三個角度睇文化村
呢度 d 櫻花都好茂盛 , 仲有梯田添 , 仲有右面白色既屋仔係 18 和平之家 , 又係蓋印既地方
而呢一棵櫻花 , 係我見過既最大
就呢度開始轉入去小路行
行行下 , 又有隻貓係你身邊行過 , 完全唔會理你
既然小路 , 即係民居中穿插 , 所以唔好咁嘈 , 同我都唔敢亂影。
而民居又擺放 d 野比大家睇
呢 d 似係舊時佢地玩既遊戲機 , 我諗係 80年代到既物品
仲有好手功既壁畫
再行前有間好似乳牛既屋仔係 25 光芒之家 , 不過係太民居 , 冇影相
而家差最後一個 point : 浴池 , 即係社區中心
要落去另一條大路先
呢條路好斜 , 真係要慢慢行
終於黎到
真係整到一個浴池咁 , 門口有個亞姐睇檔 , 呢度蓋埋個印就可以入去換第二張名信片。
而換名信片之後可以再行入去 , 見到個有個亞伯浸緊浴。
呢度都有代寄服務 , 我亦係呢度撞到2個香港女仔 , 佢地好好人 , 提我呢度換名信片。
而呢度既天台都可以上去影相。
呢個位置可以影到小王子
影完我就明白 , 點解伯伯叫我去 B 點行
因為浴池比較似文化村既中心 , 但要行番上去入口呢 , 都要上好多斜路。
行去 B 點上車既路就比較舒服 , 而且有位坐既機會都大 d 。
而呢條出路其實都幾值得行 , 因為好似一條時光隧道 , 好似返左去 80年代
過對面就係巴士站
我地係番坐巴士返去札嘎其 , 架車落完山入市區後 , 得我地同一位亞豬媽3個人。
亞豬媽問我地一堆野 , 係 , 佢係講韓文 , 我地更係 R 晒頭啦。
之後佢一邊講 , 一邊又指一指車門 , 我就估係咪問我地落車 , 我就講 : 札嘎其
亞豬媽又講一堆野 , 又同司機講一堆野 , 咁架車都係一直照行
過多一陣 , 亞豬媽又同我講野 , 又指指度門 , 我就點點頭 , 我覺得佢呢次係提我地落車
之後架車轉左個大左灣 , 我認得係頭先去坐車時既位置 , 主要認得個大型停車場。
咁我就先知亞豬媽怕我地唔識落車 , 同司機講 , 又提我地 , 佢地真係有可愛既一面。
原文轉載自: https://wow.esdlife.com/space.php?uid=20275&do=blog&id=318041
