旅行既重點行程之一，就係和服體驗啦！估唔到我一把年紀，加入師奶行列之後仲夠膽去著和服扮架妹高八度講卡哇依，不知醜字點寫既我仲拉埋幸晴爸，幸晴姨媽同婆婆落水，要死一齊死！！！
先講價錢，孤寒師奶既我覺得貴架！但持住人一世物一世就豪一次啦！
女士和服連set 頭: 5,000円 + 1,500円
男士和服: 4,000円
嬰兒和服: 5,000円
幸晴爸好唔忿氣，點解幸晴會貴過佢，XDDD
首先先係女生們揀和服，婆婆好趣致地話”唔知揀咩花好喎?! 可唔可以叫店員幫手揀呀？”, 正當我同店員講完叫佢幫幫婆婆手之際，婆婆已經手拎一件，不斷用廣東話(冇錯，係廣東話…)問架妹”點呀？呢件o唔ok呀？會唔會太花呀？”, 然後我就悄悄退後，有得佢地用廣東話同日文溝通……哇！又work 喎！
揀完和服之後，原來內衣，腰封，配件都有得揀！不過呢幾部分店員會幫手配色，所以過程算快，最後揀埋包包就去俾$啦！
之後女生們被帶上房換衫set頭，同一時間，幸晴爸被帶去另一間房揀衫換衫同等……而幸晴就跟住我，被店員帶入一間房仔內揀和服(BB2歲以下款其實得幾件)，私心地揀左紅色同我自己果件襯下，點知轉頭店員又去揾左件有兔仔既出黎，幸晴一見到兔仔就勁high 勁say hi, 仲錫錫兔兔，你話點可以唔揀兔仔款丫
幸晴件和服好易著，零掙扎就換好衫，反而到我地換既時候，見到媽媽我，婆婆，姨媽愈來愈奇怪，不禁大喊起來，我唯有著住件內衣抱佢安撫完先再著落去
最後set埋頭，配多件外套就完成啦！先望下幸晴子個look 先！
因為和服店好近清水寺，我地第一站就行去清水寺！幸晴果日超乖，自己行冇扭抱，面對長長既階梯都堅持自己行，之後仲自己堅持行埋祇園同花見小路(全程唔肯俾人抱)，結果最後食食下lunch 就累到訓著左，去伏見係被抱上去既！不過你已經好叻女啦！
溫馨提示
1. 我地上網預約左岡本和服店，貪佢多好評，建議一定一定要預約左先！最好有幾早就book到有幾早！由揀和服，揀內衣，揀腰帶，揀手袋，到著和服加set 頭最少用你一小時！我地book 左最早既九點，仲可以襯一開門人少少揀和服
2. 冬天著和服唔凍咩？！我地一到認為仲暖過著羽絨！事關和服真係有好多層，再加我地入面可以偷雞著底衫，只要你薄薄地，個領夠低店員唔會阻止你著係最入既
3. BB 都可以著和服？！係得既！雖則佢話100cm左右，但幸晴70cm多少少，一樣著到！只係條裙要抽高D姐
4. 女生們如要化妝，最好出發前化好晒，千祈唔好著好和服先化，日本人好重視和服，唔好整到有粉，唇膏印落件和服度呀
5. 大肚都可以著和服？！係得既！不過到場最好再同店員講聲，再留意果段時間自己有冇咩唔舒服，如果你自己覺得ok 就冇乜問題架啦！ 同時間，到著和服時要再講多幾次你大肚，腰帶會放高D放鬆D，唔會整到肚入面個小baby
6. 可以簽卡嗎？係得既！
人一世物一世體驗，真係好開心呀！不過應該冇下次啦！下次都係幸晴著算，幸晴媽子我雖然覺得今次和服體驗好值得，但著和服行真係好累既呢！我著波鞋睇實佢會自在D
原文轉載自: https://wow.esdlife.com/space.php?uid=63794&do=blog&id=301814
