自從有左雪山隧道之後, 依家去宜蘭方便左好多啦! 由台北車站搭客運去宜蘭一個鐘就到, 可惜既係桃園機場冇直車去宜蘭, 要先搭一小時車去台北車站, 再搭一小時車去宜蘭…….為左爭分奪秘, 我地決定包車接送我地由機場去宜蘭一程, 車程其實都係一個鐘頭左右就到…..慳返一個鐘, 又舒服咁多, 都算抵啦
另外, 宜蘭係冇捷運既, 只有火車同埋公車, 就算你想打的都未必係隨手截到的士, 我二姐試過打的去梅花湖, 結果走果時冇車走……行左好大段路先有……所以今次佢知道我會去宜蘭, 千叮萬囑我一係租車自己玩, 一係就包車搵司機車我地四圍去, 而我地最後揀左包車, 亦都因為包左車, 我可以想去邊就去邊, 唔駛怕唔識路, 迷路, 地方唔就腳既事
去到宜蘭, 點都要去望下宜蘭既全景同龜山石既, 左揀右揀, 比我搵到呢間咖啡餐廳, 除左睇到全景之餘, 仲算係一間親子餐廳架, 點解?! 睇落去就知架啦….
我地到既時候幸晴仲訓緊, 可以放低佢慢慢睇野食……呢度D野食偏貴….應該係話比起宜蘭其他餐廳黎講算貴, 如果同香港比, 呢個價錢都算合理, 佢又望到山又望到海喎!!!!
野食方面一D都唔求其, 牛扒(7成熟)大大件之餘唔係得個大字架, 仲好好味! 出面焦香味入面仲好鬼JUICY~~
小食拼盤, 係以為牛扒唔夠飽而叫既, 點知…..我覺得呢度每樣野都係4人份量呀!!! 我地真係每樣食到一半就食唔落…….
全部香口野又點會唔好食呀, 仲要即叫即炸…..熱氣爆燈!!! 但你又停唔到口喎……
飲品方面, 唔難飲, 但未特別到令我掛住佢
好啦, 幸晴醒左啦, 咁係時候介紹下間餐廳啦!
係餐廳外面已經有熊貓歡迎我地(呢張係走時拍)
然後門口位有啤啤鞦韆
一入門口有黑板可以塗鴉, 仲有一隻超大熊熊係度
再入去, 有超多熊啤啤係度呀!!!!幸晴呢？！！XDDD
媽媽桑帶小姐們出場~~XDDDD
餐廳空間好大, 唔會有逼既感覺, 我地專登揀室外坐, 一邊望住遠處個海一邊食LUNCH, 好寫意~~
呢度叫得兔子餐廳, 又點少得兔仔丫
呢度應該本來應該用黎放兔仔既, 但因為有人投訴後, 先將兔仔用籠養起黎, 再提醒大家千祈唔好大叫, 因為兔仔好易嚇親架咋
仲有鞦韆滑梯等玩具, 不過因為落雨, 我地冇機會玩啦
呢度仲有個迷宮架! 可惜我地果日落完雨, 地下D泥幾嘔心….所以…..等下次有機會再黎玩過先
提提大家, 呢度冇育嬰室架! 換片既地方都只係呢個紅布地方, 扣左少少分, 不過佢係兔子迷宮咖啡餐廳, 唔係標明係親子餐廳既, 所以都算係情有可原啦
地址: 宜蘭縣 員山鄉枕山1村15號
(可用FACEBOOK INBOX訂位, 不定期休息, 去前先訂位 或者上FACEBOOK查看)
原文轉載自: https://wow.esdlife.com/space.php?uid=63794&do=blog&id=276808
